وڭىردەگى الەۋمەتتىك از قامتىلعان وتباسى بالالارى مەن وقۋدا وزات, قوعامدىق جۇمىستارعا بەلسەنە قاتىسقان جانە ءبىلىمى مەن ونەگەلى تاربيەسى ءۇشىن وقۋشىلارعا مەملەكەت جانە دەمەۋشىلەر ەسەبىنەن ەكسپو-2017 كورمەسىنە جولداما بەرىلۋدە.
بۇگىن وڭتۇستىك قازاقستان وبلىسىنىڭ اكىمى ج.تۇيمەباەۆ حالىقارالىق مامانداندىرىلعان كورمەسىنە باراتىن مەكتەپ وقۋشىلارىمەن شىمكەنت قالاسىنداعى «وقۋشىلار سارايىندا» ارنايى كەزدەسىپ, ولاردىڭ دايىنداعان كورمەسى مەن كونتسەرتتىك باعدارلاماسىن تاماشالادى.
ەڭ الدىمەن اكىم «ەكسپو-2017 – وقۋشىلار كوزىمەن» تاقىرىبىنداعى كورمەنى ارالاپ كورىپ, «ەكسپو-2017 – قازاقستاننىڭ بولاشاعى» اتتى سالتاناتتى شاراعا قاتىستى.
تاريحي وقيعانىڭ كۋاسى بولعالى وتىرعان وقۋشىلارعا ساتتىلىك تىلەگەن ايماق باسشىسى مۇنداي مۇمكىندىكتەر, ەگەمەندى ەلىمىزدىڭ جاستارعا دەگەن ءۇمىتى مەن قولداۋى ەكەنىن اتاپ ءوتتى.
«بۇل كورمەنىڭ سىزدەر ءۇشىن ۇمىتىلماس ءارى پايدالى ەستەلىك بولاتىنىنا جانە كورمەدەن العان اسەرلەرىڭىز شىعارماشىلىقتارىڭىزدىڭ شىڭدالۋى مەن بولاشاقتا عىلىمي جاڭالىقتاردىڭ اشىلۋىنا سەپ بولادى دەپ سەنەمىن. سىزدەر تاۋەلسىز ەلىمىزدىڭ تىرەگىسىزدەر. سوندىقتان دا ءاربىرىڭىز ماڭگىلىك ەلىمىزدىڭ بەدەلىن اسىراتىن نامىستى ءارى ءبىلىمدى جانە بىلىكتى ازامات بولىپ ءوسىپ, ەلدىڭ ماقتانىشى بولۋلارىڭىزعا تىلەكتەسپىن», دەدى وبلىس اكىمى.
وسىدان سوڭ قوناقتار «بولاشاق ەنەرگياسى» ەكسپو-2017» تاقىرىبىندا وقۋشىلاردىڭ قاتىسۋىمەن وتكەن فلەشموبتى, «ەكسپو-2017 حالىقارالىق كورمەسى – بالالار الەمىندە» اتتى ساحنالىق كورىنىستى تاماشالادى.